മലയോര ജനതയുടെ വിജയത്തിന് കഠിനാധ്വാനം കരുത്തായി -കര്‍ദിനാള്‍ ക്ലീമിസ് ബാവ

നടുവില്‍: മതവിശ്വാസവും കഠിനാധ്വാനവും മലയോര ജനതയുടെ വിജയത്തിനു കരുത്തായതായി സീറോ മലങ്കര സഭാധ്യക്ഷന്‍ കര്‍ദിനാള്‍ മാര്‍ ബസേലിയോസ് ക്ലീമിസ് കത്തോലിക്ക ബാവ പറഞ്ഞു. നടുവില്‍ സെന്റ് ജോസഫ്‌സ് മലങ്കര കത്തോലിക്കാ ദേവാലയത്തിന്റെ സുവര്‍ണ ജൂബിലി ആഘോഷ സമാപനച്ചടങ്ങില്‍ ഉദ്ഘാടന പ്രഭാഷണം നടത്തുകയായിരുന്നു അദ്ദേഹം. കാണാനും കരുതാനുമുള്ള കഴിവ് മലയോര ജനതയുടെ മാത്രം പ്രത്യേകതയാണ്. പരസ്​പരം കൈത്താങ്ങ് നല്‍കി സഹകരിച്ചു മുന്നോട്ടു പോകുകയാണ് കാലഘട്ടത്തിനാവശ്യം. ആദരിക്കുകയും പ്രോത്സാഹിപ്പിക്കുകയും സ്‌നേഹിക്കുകയും ചെയ്യുന്നതിനോടൊപ്പം മറ്റുള്ളവനിലെ നന്മ അംഗീകരിക്കാനുള്ള ആത്മബലവും ഉണ്ടാകണം. നന്മയ്ക്ക് വിഭാഗീയ ചിന്താഗതി നല്‍കരുതെന്നും അദ്ദേഹം പറഞ്ഞു.

കര്‍ദിനാളിയി തിരഞ്ഞെടുക്കപ്പെട്ടശേഷം മലബാറിലെത്തിയ മാര്‍ ക്ലീമിസ് ബാവയ്ക്ക് ആവേശകരമായ സ്വീകരണമാണൊരുക്കിയത്. മുത്തുക്കുടകളുടെയും ബാന്‍ഡ് മേളങ്ങളുടെയും അകമ്പടിയോടെ അദ്ദേഹത്തെ ദേവാലയത്തിലേക്ക് ആനയിച്ചു.