ദൃശ്യചാരുത പകര്‍ന്ന് ഏഴരക്കുണ്ട്; സന്ദര്‍ശകര്‍ക്കെത്താന്‍ ഇപ്പോഴും റോഡില്ല

എഴരക്കുണ്ട്  ഫോട്ടോ : സാജു നടുവില്‍

കുടിയാന്മല: വൈതല്‍മല സന്ദര്‍ശിക്കാനെത്തുന്ന സഞ്ചാരികള്‍ക്ക് മനംമയക്കുന്ന കാഴ്ച സമ്മാനിക്കുന്ന ഏഴരക്കുണ്ടിലേക്കെത്താല്‍ റോഡ് നിര്‍മിക്കണമെന്ന ആവശ്യം ശക്തമായി. വൈതല്‍മല വികസനവുമായി ബന്ധപ്പെട്ട് ഒട്ടേറെ പദ്ധതികള്‍ നടപ്പാക്കിയിട്ടും ഈ കാഴ്ച ആസ്വദിക്കാനെത്തുന്നവര്‍ക്ക് ചെങ്കുത്തായ കുന്നിന്‍ചെരിവിലൂടെ ഇടവഴിതാണ്ടി നടക്കണം. തീര്‍ത്തും സാഹസികമായതിനാല്‍ വൈതല്‍മല സഞ്ചാരികള്‍ ഏഴരക്കുണ്ടിനെ കൈയൊഴിയുകയാണ്. നിലവില്‍ ഏഴരക്കുണ്ടിലേക്ക് പൊട്ടന്‍പ്ലാവില്‍നിന്നാണ് നടവഴി ഉള്ളത്. ഒരു കി. മീറ്ററിലധികം ദൂരംവരുമിത്. ഭൂമി വിട്ടുകൊടുക്കാത്തതുംമറ്റും മൂലം ഇവിടെനിന്ന് റോഡ് നിര്‍മിക്കാനുള്ള ശ്രമം എവിടെയുമെത്തിയില്ല.

ഏഴരക്കുണ്ട് സംരക്ഷണത്തിനായി പുതിയ നിര്‍ദേശങ്ങളുമായി ചാത്തമല വികസനസമിതി രൂപവത്കരിച്ചിട്ടുണ്ട്. കുടിയാന്മലയില്‍നിന്ന് ചാത്തമലവഴി ഏഴരക്കുണ്ടിലേക്ക് റോഡ് നിര്‍മിക്കാമെന്നാണ് വികസനസമിതി ചൂണ്ടിക്കാട്ടുന്നത്. ചാത്തമലയില്‍നിന്ന് ഏഴരക്കുണ്ടിലേക്കുള്ള 700 മീറ്റര്‍ദൂരം റോഡ് നിര്‍മിച്ചാല്‍മതി. ഈ 700 മീറ്റര്‍ വരുന്ന സ്ഥലം സ്ഥലവാസികള്‍ സൗജന്യമായി വിട്ടുനല്‍കാന്‍ സമ്മതംനല്‍കിയിട്ടുണ്ട്. പുതിയറോഡ് വൈതല്‍മലയിലേക്കുള്ള സമാന്തര റോഡാക്കി മാറ്റാനും കഴിയും. രണ്ടിന് കുടിയാന്മലയില്‍ എത്തുന്ന പൊതുമാരാമത്ത് മന്ത്രിക്ക് വികസനസമിതി ഇതുസംബന്ധിച്ച് നിവേദനംനല്‍കും. യോഗത്തില്‍ പഞ്ചായത്തംഗം മോളി ജെയിംസ്, ടി.ടി.സോമന്‍, കെ.ആര്‍.ബാലചന്ദ്രന്‍ എന്നിവര്‍ പങ്കെടുത്തു. ഭാരവാഹികള്‍: വിനോദ് കെ.കെ. (പ്രസി.), പി.കെ.ഷാജു (സെക്ര.), ബാബു പി.എം. (വൈ. പ്രസി.), എം.സി.ഷിബു (ജോ. സെക്ര.), ജോയി മൈക്കിള്‍ (ട്രഷ.).